Malai Aaryaghat Lagera Najalaunu – Bijaya Hitan

ग्रिनविच विश्वविद्यालय लन्डनबाट वातावरण विज्ञानमा स्नातकोत्तर गरेका विजय हितान हाल इङ्ग्ल्यान्डको वातावरणीय संस्थानमा कार्यरत छन् । वातावरणविज्ञका रूपमा परिचित हितानले पर्या-साहित्य सिर्जनामा विशेष चिनारी बनाएका छन् । दुई दशकभन्दा लामो समयदेखि पर्या-साहित्यमार्फत पर्यावरण संरक्षणका निम्ति विश्वव्यापी रूपमा निरन्तर लागिरहेका उनी इको राइटिङका एक अथक योद्धा हुन् । उनका कविता, कथा, निबन्ध, सिद्धान्त र उपन्यासका एक दर्जनभन्दा बढी पुस्तक प्रकाशित छन् ।
‘मलाई आर्यघाट लगेर नजलाउनू पर्यावरणीय विषयमा केन्द्रित रहेर लेखिएको कवितासङ्ग्रह हो । यस कृतिको माध्यमबाट जलवायु परिवर्तन, जैविक विविधतामा ह्रास, जल, जमिन, वायु प्रदूषण एवम् विश्वव्यापी रूपमा प्राणी, वनस्पति तथा मानव जगत्ले भोग्नुपरिरहेका यावत् समस्याहरूलाई नजिकबाट महसुस गर्न सकिन्छ | एक कविको दृष्टि र चेतनाबाट प्रकृति संरक्षणका निम्ति हृदयबाट लेखिएका शब्दहरू हुन्, यी ।