Suntali (Thapa) – Hari Singh Thapa

गरिबी, खानदानी, प्रेम र जीवनको सम्बन्ध समाज, संस्कृति, परम्परा र समयसित जोडेर नायक हुन नसकेको नायकसित उपन्यास अगाडि आएको छ । समयसँग पराजित हुँदै र अगाडि बढ्दै देश-विदेशको जमिनबाट उपन्यासको प्रमुख पात्र भोलाले लिएको निर्णय र समय दुर्घटना भएको उपन्यासले लिएको निर्णय उपन्यासमा फैसलाका रूपमा प्रस्तत छ। व्यक्त प्रेमको पराजय भएर अव्यक्त प्रेमको विजयको घोषणा उपन्यासले गरेको छ । यो घोषणा उपन्यासकारले परम्परागत समाजमा आएर गरेका छन् । एउटा प्रेमले अर्को प्रेमलाई विस्थापित गरेको छ । भोलासँगको वैवाहिक प्रेमलाई विस्थापित गरेर सुन्तली मार्जिनल केटो विमलको प्रेमलाई वरण गर्न पुग्छे । एउटा सार्विक सत्यलाई अर्को अव्यक्त सत्यले विस्थापित गर्ने यो उपन्यास उत्तरआधुनिक सोचभित्रैको अर्को सोच हो । भोलाले आफ्नो मिलनको संयोग उपन्यासकी प्रमुख पात्र सुन्तलीमा नभेटे पनि प्रेम शब्द कै पराजय भने उपन्यासले गरेको छैन । यो उपन्यासको विजय यही हो र उपन्यासकार हरिसिंह थापाको वैचारिक सामर्थ्य पनि यही हो।