Brahmamurhat – Govindkumar Shrestha

पद र प्रतिष्ठाको अहम्ले मानिसलाई कहिलेकाहीं विवेकशून्य वा अविवेकी पनि बनाउँदो रहेछ । एउटाको अविवेकपूर्ण निर्णयले अर्को व्यक्ति अकारण प्रताडित हुने सम्भावना पनि हुँदोरहेछ । मानवीय मूल्य र मान्यताको कसीमा यस्तो स्थितिलाई जायज मान्न भने सकिँदैन ।
एउटा अशिक्षित भुइँमान्छे सत्य स्थापित भएकोमा खुसी थियो । अर्का ओहोदाधारी व्यक्ति भने आफ्नो अहम्‌मा चोट पुगेकोमा केही विचलित र आक्रोशित थियो । खुसी र आक्रोश, सन्तुष्टि र असन्तुष्टि मानवजन्य गुणको परिचायक नै हो ।
मानिसमा प्रेम, सद्भाव, सहानुभूति, प्रशंसा मात्र कहाँ हुन्छ र ? रिस, राग, द्वेष, ईर्ष्या, घृणाको पनि पुलिन्दा हो मानिस । जसमा जुनको मात्रा बढी हुन्छ त्यसैअनुसार चरित्र निर्माण हुने हो । अनि चरित्रअनुसार स्वभाव विकास हुने र स्वभावअनुरूपको आचरण व्यवहार हुने न हो ।